INGAT KARINGAT PAPA | CERITA AMBON

motivasikristen.com

Lahir deng salamat basar deng makanan kabong biking beta seng bisa lupa karingat papa.

Kalimat diatas mewakili basuadara gandong yang pung orangtua cuman baharap di kabong par tongka-tongka hidup.

Matahari bolom tapancar akang pung sinar, deng suara ayam berkokok masih dapa dengar kantara, katong su dengar batu goso su babunyi di balakang rumah, seng pake minum teh kong su bajalang pigi kastinggal katong deng mama.

Bangun pagi yang katong lia cuman mama, katong jaga batanya " Mama papa dimana? "Papa su pigi kabong, pisang deng pala su bisah panen.

Papa cuman pasang skolah bae-bae, deng seng usa pikir uang skolah karna papa masih sehat deng tanaman su bisa panen.

Beta dengar mama pung kata-kata itu, mata sadiki bakaca, deng mulai tanam prinsip "beta harus jadi orang sukses."

Pulang skolah makan deng apa adanya, nasi jua kadang-kadang baru katong dapa lia akang tataru di meja makang.

Kasbi, sagu, ikang sapanggal deng colo-colo hiasi meja makang, tapi yang ada di hati cuman bersyukur saja. Abis makang tanya mama, papa di mana?

Papa bolom pulang dari kabong, abis makang la pigi panggel antua pulang makan dolo. Seng pake pikir panjang, beta langsung bajalang pigi.

Dalam perjalanan cuma bapikir "kapan beta bisa balas papa pung karingat yang su jatuh par beta". Sampe di kabong pas jam satu siang. (13:00).

Beta kira papa ada santai di bawa pohon, par kasih istirahat antua pung badan yang lala, padahal ada diatas pohon di bawa terik matahari yang bagitu panas.

Dari jauh beta cuman lia papa sapu-sapu karingat yang malele jatuh di papa pung muka, beta pung hati rasa ancor deng baharap Tuhan kasih antua umur panjang jua supaya beta bisa lia antua beso-beso deng beta pung hasil karja.

Beta badekat langsung beta bilang "Papa e turun makan dolo, su jam makan ini? Antua jawab "Papa masih kanyang, jadi sadiki lai."

Beta mulai bantu-bantu papa, punggul itu palah yang jatuh, beta pung mata skali-skali jaga lia antua diatas, karingat malele, baju su basah, deng poro su lapar mar antua tahan samua.

Lihat antua su lala, beta bataria deng suara karas, "Papa e turun sudah nanti abis makan baru nai ulang par kasih habis"

Akhirnya antua turun dan katong basiap par pulang, dalam perjalanan beta lita baju su basah, karingat tarus malele deng bajalang jua su seng kuat.

Beta pung hati tamba kasih kuat deng mulai pegang prinsip "Beta harus jadi Orang."

Basudara gandong e, Tulisan beta kali ini hanya mengingatkan. Jang lupa papa pung karingat, jang lupa antua pung lala par ale dong dolo-dolo.

Sakarang ale dong su jadi orang, ale dong harus balas karingat yang yang antua su kasih jatuh par kasih skolah ale dolo-dolo.

Kalu sakarang ale karja di rungan yang berAC, ale dapa lia tampan deng sejahtera, tapi kalu ale membayangkan dari pagi sampe siang antua ada di bawa matahari, apa yang ale rasakan gandong e.

Jadi mulai sakarang jang balaga deng harta, kalu bolom kasih bahagia papa yang ada di kampong, ingat karingat yang jatuh akang ada di saribu tampa yang berbeda hanya untuk ale deng beta pung skolah deng masa depan.